விரும்பி
விரும்பி விட்டோம்
விட்டு
விட்டு விரும்பினோம்
விரும்பி விரும்பி விட்டோம்
விட்டு விட்டு விரும்பினோம்
விரும்பல் விடுதல் இரண்டும்
விட்டோம் வீடு பெற்றோம்
விருப்பமாய் இருந்தது பின்னர்
வெறுப்பாய் போனது பின்னும்
விருப்பமாய் பூத்ததும் வேண்டா
வெறுப்பாய்ப் போனது போனதே
விருப்பம் இல்லை யானால்
விளக்கம் வருவ தில்லை
வெறுப்புதான் இல்லை யானால்
மேற்படி ஏறல் இல்லை
இருந்த படிஇருந் துவிட்டால்
இல்லை படிநிலை வளர்ச்சி
இருந்த படிஇருந் துவிட்டால்
இல்லை பிறப்பிறப் பில்லை
திருந்தல் திருப்பம் பெறுதல்
திருந்தத் திருந்த நிலைபெறல்
வருந்தல் வருத்தப் படுதல்
வருந்த வருந்த கலைபெறல்
நிலைக்கு நிலைஉளம் பெயர்தல்
நிலைபெற வாய்த்திடும்
பெயர்ச்சி
நிலைக்கு நிலைஉளம் தெளிதல்
நிலைபெற உய்த்திடும் பயிற்சி
பெயரும் இடைநிலை உள்ளது
பேரும் இயற்கை என்பது
பெயராப் பெருநிலை உள்ளது
பேரா இயற்கை என்பது
பெயரா நிலைகட வுள்நிலை
பெயரும் நிலைவினை படுநிலை
பெயரா நிலைக்குப் பெயர்ந்திடும்
பெயர்ச்சி நிலைகளே பிறவிகள்
அரும்பி அரும்பிச் செத்தோம்
செத்துச் செத்தும் அரும்பினோம்
திரும்பித் திரும்பி நோக்கினோம்
திருந்தும் நோக்கம் நோக்கினோம்
விருப்பில் வெறுப்பில் நடுவில்
வினைபடு நிலையொரு கருவி
பிறப்பில் இறப்பில் பிறங்கிப்
பிறங்கி ஆடிய அருவி
வினைவழி பதிவுறும் அறிவும்
இன்ப துன்ப உணர்வும்
துணைபெற ஒருவடி வாகும்
உள்ளொளி விளக்கம் ஆகும்
வினைபடா வரையில் அறிவென
எதுவுமே பதிவுறல் இல்லை
வினைபட அறிவுறும் அறிவுற
விலகிடும் அறியா மைகளும்
இருவினை கிடந்துபின் கடந்த
நிலைவரும் நிலைவர நிலைவர
இருவினை ஒப்பால் வினைகெடும்
இறைநிலை உயிர்நிலை புலப்படும்
நெருப்பில் இரும்பு சேர்ந்தால்
நெருப்பின் வண்ணமாய் நிற்கும்
நெருப்பும் இரும்பும் வேறாய்
இராமல் இரண்டற் றிருக்கும்
பிறப்பில் இறப்பில் கடந்து
பிறவா இறவா நிலையும்
சிறப்பெனும் செம்பொருள் நிலையாய்
சேர்வது செறிவது நிலையே
No comments:
Post a Comment